काठमाडौं महानगरपालिकाका मेयर बालेन्द्र शाह (बालेन) ले महानगरका कर्मचारीले पैसा मागे त्यसको प्रमाण आफूलाई पठाउन आग्रह गरेका छन् ।
सोमबार फेसबुकमा स्टाटस लेख्दै बालेनले भनेका छन्- हाम्रो अधिकारक्षेत्र काठमाडौं महानगरपालिका कार्यालयमा कुनै पनि कर्मचारीले कुनै पनि प्रकारमा पैसा मागेमा प्रमाणसहित हामीलाई सम्पर्क गर्नु होला भिडियो अडियोसहित ।
आफूले भ्रष्टाचार भएको हेर्न नसक्ने उल्लेख गर्दै उनले बिनाप्रमाण आरोप नलगाउन पनि आग्रह गरेका छन् । 'कसैले बिनाप्रमाण यसले यति भ्रस्टाचार गर्यो भनेर आरोप लगाउनुभन्दा पनि प्रमाण जुटाउनु होला,' बालेनले फेसबुकमा लेखेका छन् ।
उनले आफूले बोक्ने मोबाइलमा ह्वाट्सएप गरेर प्रमाण पठाउन पनि आग्रह गरेका छन् । उनले आफूले बोक्ने भन्दै ९८६३५९२०११ मोबाइल नम्बर पनि सार्वजनिक गरेका छन् ।
