कञ्चनरुप । सप्तरीको कञ्चनरुप नगरपालिका–५, पथरीकी कविता देवी सरदार बहुविवाह मुद्दामा अदालतबाट दोषी ठहर भइसकेकी थिइन्। सप्तरी जिल्ला अदालतले उनलाई १ वर्ष ५ महिना १६ दिन कैद र १५ हजार रुपैयाँ जरिवानाको फैसला सुनाएपछि उनी फरार बनेकी थिइन्। अदालतको आदेश कार्यान्वयन नहुँदा फाइल त अदालतमा थन्किएको थियो, तर प्रहरीको खोजी भने निरन्तर चलिरहेको थियो।
जिल्ला प्रहरी कार्यालय सप्तरीले सरदारको खोजतलासलाई तीव्र बनाएको थियो। अन्ततः सोमबार, लुकेर बसिरहेकी सरदार प्रहरीको फन्दामा परिन्। पक्राउसँगै बहुविवाह मुद्दाको पुरानो फैसला पुनः सक्रिय भयो।
पक्राउ परेकी सरदारलाई सोमबार नै आवश्यक कानुनी प्रक्रिया पूरा गरी सप्तरी जिल्ला अदालतमा दाखिला गरिएको छ। यसबारे जानकारी दिँदै सप्तरीका प्रहरी प्रवक्ता डिएसपी डम्बर बहादुर पुरीले अदालतको फैसलाअनुसार सजाय कार्यान्वयनका लागि प्रतिवादीलाई नियन्त्रणमा लिइएको बताए।
