कञ्चनरूप । तिरहुत गाउँपालिकाले किसानहरूको कृषि कार्यलाई सहज, प्रभावकारी तथा आधुनिक बनाउने उद्देश्यले किटनाशक तथा कृषि औषधि छर्कन प्रयोग हुने एक यस भन्दा बढि स्प्रे मेसिन वितरण गरेको छ।
गाउँपालिकाका अध्यक्ष विजय कुमार यादव ले पालिकाभित्रका किसानहरूको आवश्यकतालाई मध्यनजर गर्दै ५ वटै वडाका किसानहरूलाई लक्षित गरी स्प्रे मेसिन वितरण गरिएको जानकारी दिएका छन्।
अध्यक्ष यादवका अनुसार पालिकाका ५ वटै वडामा हाल एक सय वटा स्प्रे मेसिन वितरण गरिएको हो। उनले किसानहरूलाई किटनाशक तथा विभिन्न कृषि औषधिको प्रयोगमा सहजता ल्याउन, रोग तथा कीरा नियन्त्रण प्रभावकारी बनाउन र कृषि उत्पादन वृद्धि गर्ने उद्देश्यले उक्त कार्यक्रम सञ्चालन गरिएको र थप अरु केहि किसानहरूलाईमेसिन वितरण गरिने बताएका छन ।
त्यसैगरी, वितरण कार्यक्रममा दलित तथा सिमान्तकृत समुदायका किसानहरूलाई विशेष प्राथमिकता दिइएको अध्यक्ष यादवले उल्लेख गरे। गाउँपालिकाले समावेशी विकासको अवधारणाअनुसार कृषि क्षेत्रमा पछाडि परेका समुदायलाई प्राथमिकतामा राखेर सहयोग उपलब्ध गराइएको जनाएको छ।
स्थानीय किसानहरूका अनुसार गाउँपालिकाले प्रत्यक्ष रूपमा कृषकलाई लाभ पुग्ने गरी सञ्चालन गरेको यो कार्यक्रम निकै उपयोगी रहेको छ। आधुनिक कृषि उपकरणको पहुँच बढ्दै जाँदा खेतीपाती थप व्यवस्थित, सहज र उत्पादनमुखी बन्ने विश्वास लिइएको छ।
तिरहुत गाउँपालिकाले आगामी दिनमा पनि किसानमैत्री तथा उत्पादनमुखी कार्यक्रमलाई निरन्तरता दिँदै कृषि क्षेत्रको आधुनिकीकरणमा जोड दिने जनाएको छ।
