कञ्चनरुप। पूर्व–पश्चिम राजमार्गअन्तर्गत कमला–कञ्चनपुर सडक खण्डको चार लेन विस्तार कार्यमा चरम ढिलाइ हुँदा स्थानीयवासीले सास्ती खेपिरहेका छन्। वर्षौंदेखि निर्माणाधीन सडक समयमै सम्पन्न नहुँदा हिउँदमा धुलो र वर्षामा हिलोको समस्या झेल्नु यस मार्गबाट आवतजावत गर्ने लाखौं यात्रु र स्थानीयको नियति बनेको छ।
नेपाल सरकारको रूपान्तरणकारी गौरवको आयोजना मानिएको ८६.८३ किलोमिटर लामो यो सडक खण्ड निर्माणको जिम्मा चाइना रेलवे नम्बर–२ इन्जिनियरिङ ग्रुप ले जुन २०२० मा पाएको थियो। करिब १५ अर्ब ६६ करोड रुपैयाँ लागतको यो आयोजनामा सडक, पुल, कल्भर्ट, ओभरपास, अन्डरपास र बाइपास निर्माण गरी २०२३ अक्टोबर २८ भित्र काम सक्नुपर्ने सम्झौता थियो। तर हालसम्म ६९ प्रतिशत मात्रै भौतिक प्रगति भएको छ।
यस सडकको पूर्वी खण्ड कञ्चनपुरदेखि कुशहासम्म ३९.४२ किलोमिटर तथा पश्चिमी खण्ड कुशहादेखि कमलासम्म ४७.४१ किलोमिटर छ। अधिकांश ग्रामीण क्षेत्रमा काम अघि बढे पनि मुख्य बजार खण्डमा ओभरपास र ६ लेन विस्तार सुस्त हुँदा स्थानीय दैनिक धुलो, जाम र दुर्घटनाको जोखिम झेल्न बाध्य छन्।
स्थानीयवासीको गुनासो छ— पटक–पटक म्याद थप्दा पनि निर्माण कम्पनी र सम्बन्धित सरकारी निकायले चासो नदिँदा सर्वसाधारणले दुःख पाइरहेका छन्। अब वर्षा सुरु भएपछि सडक थप हिलाम्य हुने, पानी जम्ने र दुर्घटना बढ्ने भएकाले सरकारले तत्काल हस्तक्षेप गर्नुपर्ने उनीहरूको माग छ।
