काठमाडौं, ५ जेठ । ऊर्जा, जलस्रोत तथा सिंचाई मन्त्री शक्तिबहादुर बस्नेतले सरकारले विद्युतीय साधनको प्रयोगलाई प्राथमिकतामा राखेको बताउनुभयो । उहाँले सुन्दर अटो इञ्जिनियरिङ् प्रालिद्वारा आफ्नै डिजाइनमा तयार गरिएको नेपाली इलेक्ट्रिक मोटरसाइकल ‘गन्तव्य’को उद्घाटन कार्यक्रममा सो कुरा बताउनुभयो ।
मन्त्री बस्नेतले भन्नुभयो, ‘उर्जामा सबैको पहुँच र उर्जा सुरक्षालाई सुनिश्चित गर्ने कुरामा, जलस्रोतमा आधारित उर्जाबाट मुलुकको समृद्धिमा सहयोग पुर्याउने उद्देश्यले यसलाई व्यापक बनाउने सरकारको प्राथमिकताको विषय हो । सरकारले विद्युतीय साधनको प्रयोगलाई पनि प्राथमिकतामा राखेको छ ।’
मन्त्री बस्नेतले पेट्रोलियम सवारीलाई विद्युतीय बनाउने प्रयाले नेपाल र नेपाली दुवैले फाइदा लिन सक्ने भन्दै काठमाडौं लगायत अन्य क्षेत्रमा ट्रली बस सञ्चालनका लागि सरकार सक्रिय रहेको बताउनुभयो ।
ऊर्जा, जलस्रोत तथा सिंचाई मन्त्रालयका सचिव दिनेशकुमार घिमिरेले सुन्दर अटो इन्जिनियरिङले नेपालमै इलेक्ट्रिक मोटरसाइकलको उत्पादन गरेर ऊर्जा आयातलाई क्रमशः कम गराउँदै लैजाने कार्यमा सघाउ पुर्याउन भूमिका खेलेकोमा सुन्दर यातायातका अध्यक्ष भेषबहादुर थापालाई धन्यवाद दिनुभएको थियो ।
सरकारले समेत आगामी दिनमा चार्जिङ स्टेशन निर्माणदेखि अन्य विभिन्न समस्याहरुलाई समाधान गर्न निरन्तर सहयोग गर्ने बताउनुभयो ।
